Þokkasverð er fíngerð útgáfa af indíánafjöður

Sem áhugamanni um pottaplöntur glenni ég alltaf upp augun þegar ég sé nýja tegund eða nýjan blending af slíkri plöntu. Nýverið rakst ég á eina slíka í Blómavali. Plantan sem um ræðir kallast á latínu Sansevieria hybrid panthea og er eins konar lágvaxinn og fíngerðari útgáfa af indíánafjöður en eins og heitið, hybrid, segir ræktunarblendingur tveggja Sansevieria-tegundum.

Þeir sem til þekkja vita að á markaði eru fjöldinn allur af Sansevierur sem á íslensku kallast meðal annars keisarasverð, snákasverð og indíánafjöður.

Þokkasverð er sígræn planta með uppréttum ílöngum og sverðlaga blöðum, með grænum og fölgulum þverrákum, sem vaxa þétt saman og verða um 40 sentímetra löng.

Uppruni Sanseviera er suðvesturhreppum Afríku þar sem þær þrífast í sterki sól og fá sjaldan regn. Þetta eru því upplagðar plöntur í suðurglugga og tilvaldar fyrir fólk sem er latt við að vökva. Hefðbundin, sendin og eilítið kalkblönduð pottamold hentar þeim vel og gott er að vökva með vægri áburðalausn annað slagið. Þrífst best í þröngum potti. Ótrúlega harðgerðar og auðveldar plöntur í ræktum og nánast ódrepandi sé þær ekki vökvaðar of mikið.

Ættkvíslarheitið Sansevieria til heiðurs ítalska prinsinum af Sansevero,
Raimondo di Sangro, uppi 1710 til 1771. Sangro var áhugamaður um garðyrkju og fjarmagnaði rannsóknir í ræktun. Tegundarheitið panthea er úr grísku og vísar til visku og þokka grískra gyðja og leyfi ég mér því að kalla blendinginn þokkasverð á íslensku.

- Vilmundur Hansen